Pages

Saturday, 4 February 2017

இராமநாதபுரம் அருகே மேலக்கன்னிசேரியில்100 ஆண்டுகள் பழமையான பர்மா வெள்ளை விநாயகர் கோயில் - வே.இராஜகுரு




இராமநாதபுரம் தொல்லியல் மற்றும் வரலாற்றுப் பாதுகாப்பு மையத்தின் தலைவர் வே.இராஜகுரு, செயலாளர் காளிமுத்து, கமுதி ஒருங்கிணைப்பாளர் வெள்ளைப் பாண்டியன் ஆகியோர் முதுகுளத்தூர் பகுதி கிராமக் கோயில்கள் பற்றிய களஆய்வின்போது, மேலக்கன்னிசேரி கிராமத்தில் நூறு ஆண்டுகளுக்கு முன் பர்மாவில் இருந்து கொண்டுவரப்பட்ட வெள்ளை விநாயகர் சிலையைக் கொண்டு  கோயில் அமைத்து இருப்பதைக் கண்டறிந்தனர். இது பற்றி தொல்லியல் ஆய்வாளர் வே.இராஜகுரு கூறியதாவது,

விநாயகர் வழிபாடு

விநாயகர் வழிபாடு பரவலாக உலகம் முழுவதும் பல நாடுகளில் காணப்படுகிறது. இந்தோனேஷியா நாட்டின் ருபியா நோட்டில் விநாயகர் உருவம் அச்சிடப்பட்டுள்ளது. பிற்காலச் சோழர் காலத்தில் விநாயகர் வழிபாடு தென்கிழக்கு ஆசிய நாடுகளுக்கு பரவியதாகத் தெரிகிறது. மியான்மரில் (பர்மா) விநாயகரை மகாபைனி என்கிறார்கள். இங்குள்ள புத்த சமயக் கோவில்களிலும் விநாயகர் சிலைகள் உள்ளன. இங்கு  விநாயகர் சதுர்த்தி விழா மகாபைனி என்றே கொண்டாடப்படுகிறது

பர்மா தொடர்பு

      சங்ககாலம் முதல் தமிழர்கள் மியான்மருடன் (பர்மா) வணிகத்தொடர்பு கொண்டிருந்த போதும், கி.பி.18௦0களில் தான் அதிகளவில் தமிழ்நாட்டில் இருந்து செட்டியார்கள் மற்றும் ஆங்கிலேயர்களால் கூலி வேலைக்காகவும் வணிகத்துக்காகவும் தமிழர்கள் அழைத்துச் செல்லப்பட்டுள்ளனர். அதே காலகட்டத்தில் இராமநாதபுரம் மாவட்டம் முதுகுளத்தூர், கமுதி பகுதிகளைச் சேர்ந்தவர்கள் பர்மாவின் ரங்கூன் (தற்போது யங்கூன்) பகுதிகளில் அதிக அளவில் குடியேறி உள்ளனர்.
      குறிப்பாக முதுகுளத்தூர் அருகே மேலக்கன்னிசேரி என்ற ஊரைச் சேர்ந்தவர்கள் 2௦௦ ஆண்டுகளுக்கு முன் மியான்மர் நாட்டில் வணிகம் செய்யச் சென்றுள்ளனர். பர்மாவில் இப்பகுதி மக்கள் அதிகளவில் இருந்ததால் இரண்டாம் உலகப் போர் சமயத்தில் நேதாஜியின் இந்திய தேசிய ராணுவத்திற்கு ஆள்சேர்க்க பசும்பொன் முத்துராமலிங்கத்தேவர் பர்மா சென்றுள்ளார். அவர் கேட்டுக்கொண்டதற்கிணங்க பர்மாவில் இருந்த பலர் இந்திய தேசிய ராணுவத்தில் சேர்ந்துள்ளனர். 

இவ்வூரைச் சேர்ந்தவர்கள் 6௦ ஆண்டுகளுக்கு முன்பு வரை பர்மா சென்று வணிகம் செய்துவிட்டு குறிப்பிட்ட காலத்திற்குப் பின் சொந்த ஊருக்கு திரும்பி வருவது வழக்கமாக இருந்துள்ளது.

அவ்வாறு இந்திய தேசிய ராணுவத்தில் இருந்தவர்களும் தங்கள் இறுதி காலத்தில் தங்கள் சொந்த ஊருக்கு திரும்பி வந்துள்ளனர். தற்போதும் இவ்வூரைச் சேர்ந்த 7 குடும்பத்தினர் மியான்மரில் வசிக்கிறார்கள். 196௦களில் மியான்மரில் இராணுவ ஆட்சி ஏற்பட்டபோது இவ்வூரைச் சேர்ந்த பலர், இந்தியா திரும்பி கொல்கத்தா, சென்னை ஆகிய இடங்களில் குடியேறியுள்ளனர். 

பர்மா விநாயகர் 

      இங்கிருந்து வணிகம் செய்ய பர்மாவுக்குச் சென்ற பெருமாள் தேவர் என்பவரின் குடும்பத்தினர் நூறு ஆண்டுகளுக்கு முன் அங்கிருந்து திரும்பி வந்தபோது, வெள்ளைப் பளிங்கால் வார்க்கப்பட்ட விநாயகர் சிலையை கப்பலில் கொண்டு வந்துள்ளனர். இவ்வூரில் கோயில் கட்டி இச்சிலையை பிரதிஷ்டை செய்துள்ளனர். நூறு ஆண்டுகள் பழமையான இக்கோயிலில் இன்றும் வழிபாடு தொடர்ந்து நடப்பதாக இவ்வூரைச் சேர்ந்த பாலகிருஷ்ணன் கூறுகிறார். 

 சிலை அமைப்பு 

மூன்று அடி உயரத்தில் ஐந்து கரங்களுடன் இடது காலை மடக்கி அமர்ந்த நிலையில் உள்ளார் விநாயகர். அவரின் இடது பின்  கையில் பாசக்கயிறும் வலது பின் கையில் அங்குசமும் உள்ளன. வலது முன்கையில் ஒடிந்த தந்தமும், இடது முன் கை, துதிக்கையை பிடித்தவாறும் உள்ளது. பிற்காலச் சோழர்களின் சிற்பக்கலை அமைப்பில் இச்சிலை அமைந்துள்ளது.  

கடல் பயணத் துணையாக விநாயகர்

தமிழர் கடல் கடந்து சென்று வியாபாரம் செய்யும் காலத்தே அவர்கள் தமது வழித்துணையாக விநாயகர் உருவத்தை எடுத்துச் செல்வது வழக்கம். அவ்வாறு எடுத்துச்சென்ற விநாயகர் சிலைகளைக் கொண்டே அவர்கள் சென்ற நாடுகளில் கோயில் கட்டியுள்ளனர். தமிழர்களால் பர்மாவில் கி.பி.1860 இல் கட்டப்பட்ட முதல் கோயில் சித்தி விநாயகர் கோயில் என்பது குறிப்பிடத்தக்கது.


கடல் பயணத்தின் போது வழித்துணையாக எடுத்து வரப்பட்டதாக இந்த வெள்ளை விநாயகர் சிலை இருக்கலாம். சொந்த ஊருக்கு பத்திரமாகத் திரும்பியதும் இச்சிலையைக் கொண்டு கோயில் கட்டியிருப்பதாகத் தெரிகிறது.



நாளிதழ் செய்திகள்



தி இந்து 




தினமலர்
 

 

Friday, 3 February 2017

கடலுக்கு நன்றி செலுத்தும் மீனவர்களின் பாரம்பரிய பொங்கல் திருநாள் வளமை வழிபாடாகக் கொண்டாடப் படும் சப்தகன்னியர் வழிபாடு – வே.இராஜகுரு


சப்தகன்னியராய் தேர்வு செய்யப்பட்ட சிறுமியர் பொங்கல் வைக்கிறார்கள்
தாய்த்தெய்வ வழிபாடு 

மனித இனம் தோன்றிய காலம் முதல் உலகம் முழுவதும் பல நாடுகளில் பெண்களைத் தெய்வமாக வழிபடும் வழக்கம் இருந்து வருகிறது. வளமை, வலிமையின் அடையாளமாக பெண்களை தமிழர்கள் பழங்காலம் முதல் கருதி வந்தனர். அதனால் அவர்களின் நாட்டார் வழிபாட்டில் முதல் வழிபாட்டுக்குரிய கடவுளாக பெண் விளங்குகிறாள். பழந்தமிழ் இலக்கியங்களில் பெண் தெய்வ வழிபாடுகள் பற்றிய குறிப்புகளும் அதிகம் உள்ளன.
அனைத்து மனித உயிர்களுக்கும் தாயாகவும், என்றும் மாறாத, அழியாத கன்னித் தன்மையுடையவள் என்ற அடிப்படையில் கன்னியாகவும் பெண் தெய்வங்களை வழிபடும் மரபு காணப்படுகிறது. நதிகள், நாடுகள் ஆகியவை பெண்களின் பெயரால் வழங்கப்பட்டு வருவதும் பெண்ணை தெய்வமாக மதிக்கும் மனப்பான்மையின் வெளிப்பாடுதான்.

சப்த கன்னியர் வழிபாடு


வளமை வழிபாடான ஏழு கன்னியர் எனப்படும் சப்த கன்னியர் வழிபாடு, உழவுத்தொழில் செழிக்க, செல்வம் பெருக, குழந்தைகள் நோயின்றி வளர, தொழில் சிறக்க அனைவராலும் வழிபடப்படுகிறது. இவ்வழிபாடு தமிழகம் முழுவதும் அனைத்து ஊர்களிலும் காணப்படுகிறது.
      இராமநாதபுரம் அருகே மோர்ப்பண்ணை என்ற ஊரில் ஒவ்வொரு ஆண்டும் பொங்கல் நாளில் ஏழு சிறுமியரைக் கொண்டு பொங்கல் வைக்கச் செய்து, தங்களுக்கு மீன்வளம் தரும்  கங்காதேவியாக கடலை வழிபடுகின்றனர். இதுபற்றிய விவரம் வருமாறு, 

மோர்ப்பண்ணை ஸ்ரீரணபத்திரகாளி அம்மன் கோயில்

இராமநாதபுரம் மாவட்டம் உப்பூர் அருகே கடலூர் ஊராட்சியைச் சேர்ந்த மோர்ப்பண்ணை என்ற ஊரில் ஸ்ரீரணபத்திரகாளி அம்மன் கோயில் உள்ளது. இக்கோயில் கருவறையில் ஸ்ரீரணபத்திரகாளி, வாழவந்த அம்மன், கட்டாரி காளி ஆகிய தெய்வங்கள் உள்ளன. 


பொங்கல் நாளில் வழிபாடு 

இக்கோயிலை வழிபடும் கடையர் எனும் மீனவ சமுதாயத்தினர் ஒவ்வொரு ஆண்டும் ஊர் கூட்டம் போட்டு 11 முதல் 13 வயதுக்குட்பட்ட 7 சிறுமிகளை தேர்வு செய்கிறார்கள். வெவ்வேறு குடும்பத்தைச் சேர்ந்தவர்களுக்கு அடுத்தடுத்த ஆண்டுகளில்  வாய்ப்பு அளிக்கப்படுகிறது. இந்த ஆண்டு சுனந்தாவதி, ஹர்ஷினி, மன்மதா, அனிதா, சிங்கராணி, லத்திகா, சத்தியப்பிரியா ஆகிய சிறுமிகள் சப்தகன்னியராய் தேர்வு செய்யப்பட்டனர்.


பொங்கல் நாள் அன்று ஊரில் உள்ள அனைவரும் தங்கள் வீடுகளில் பொங்கல் வைத்தபின்பு, குறிக்கப்பட்ட நல்ல நேரத்தில் தேர்வு செய்யப்பட்ட ஏழு சிறுமிகளுடன் கோயிலுக்கு வந்து வணங்குகிறார்கள். பின்பு அச்சிறுமிகள் கடலிலும், குளத்திலும் நீராடுகின்றனர். கோயில் முன்பு அமைக்கப்பட்ட வேப்பிலைத் தோரணம் எதிரில், ஏழு அடுப்புகளில் ஏழு பானைகள் கொண்டு பெரியவர்களின் உதவியோடு பொங்கல் வைக்கிறார்கள். பொங்கல் பொங்கியதும் குலவையிடுகிறார்கள். பொங்கல் தயாரானதும் அப்பானைகளை கோயில் முன் வைத்து விட்டு அவ்வூர் முனியையா கோயிலுக்கு ஆண்கள் மட்டும் சென்று வழிபடுகிறார்கள். அதன் பின் மஞ்சள் கலந்த பால் நிரப்பப்பட்ட ஏழு  கரகச் செம்புகளோடு, ஏழு வாழையிலைகளில் பொங்கலை வைத்து அம்மனுக்குப் படைக்கிறார்கள்.

பாய்மரப்படகு 

தென்னம்பாளையில் அழகிய வண்ணம் பூசப்பட்டு தயாரிக்கப்பட்ட சிறிய பாய்மரப் படகின் உள்ளே பூசைப்பொருட்களோடு இலையில் பொங்கல் வைத்து அதன் நடுவில் நெய் ஊற்றி திரியிட்டு விளக்கு ஏற்றுகிறார்கள்.  கிராமத் தலைவர் கனியிடம் அந்த பாய்மரப் படகை கோயில் பூசாரி எடுத்துத் தருகிறார். அவர் அதை கைகளில் ஏந்திக்கொண்டு முன் செல்ல சப்த கன்னியர்களான அச்சிறுமியர் கரகச் செம்பை தலையில் ஏந்தி பின் செல்ல மேளதாளத்துடன் கடலை நோக்கிச் செல்லும் அவர்கள் கழுத்தளவு தண்ணீர் உள்ள இடத்துக்குச் சென்று பாய்மரப் படகை கடலில் விட்டு விட்டு, கரகச் செம்பில் உள்ள   மஞ்சள் கலந்த பாலை கங்காதேவியாக வழிபடும் கடலில் கொட்டி வழிபடுகிறார்கள். பாய்மரக் கப்பல் கடலில் காற்று அடிக்கும் திசையில் அடித்து ஆழ்கடல் பகுதிக்குச் செல்லும். படகில் உள்ள பூசைப்பொருட்களை கடல் கங்காதேவியிடம் கொண்டு சேர்ப்பதாக மக்கள் நம்புகிறார்கள். பல ஆண்டுகளுக்கு முன்புவரை பூசைப்பொருட்களோடு ஒருகிராம் தங்கமும் வைக்கும் வழக்கம் இருந்துள்ளது. தற்போது அது இல்லை.



பாரம்பாரிய விழா 

       உழவுத்தொழில் சார்ந்த பொங்கல் திருநாள் இவ்வூரில் தமிழர்களின் பழம்பெரும் அடையாளமான வளமை (Prosperity) வழிபாடாக கொண்டாடப்படுகிறது. உழவுத் தொழிலுக்கு உதவியாய் இருக்கும் சூரியன், காளைகளுக்கு நன்றி தெரிவித்து கொண்டாடப்படும் பொங்கல் இங்கு தங்கள் வாழ்வை வளமாக்கும் கடலுக்கு நன்றி செலுத்தி வணங்கும் திருநாளாக கொண்டாடப்படுவது சிறப்பான ஒன்றாக உள்ளது. விழாவில் இராமநாதபுரம் தொல்லியல் மற்றும் வரலாற்றுப் பாதுகாப்பு மைய தலைவர் வே.இராஜகுரு, செயலாளர் காளிமுத்து, கிராம செயலாளர் மழைமேகம், சமூக ஆர்வலர் துரைபாலன் உள்ளிட்டோர் சிறப்பு விருந்தினர்களாக கலந்துகொண்டனர். 





 நாளிதழ் செய்திகள் 


தினமலர் 


 தி இந்து